Carnaval

Bóntje Aovendje CV De Sjansemaekers


Ouch in ós jubileumjaor van 6x11 zeen d’r uiteraard weer bóntje aovendje. Op vriedig 22 en zaoterdig 23 fibrewari zeen dees bóntje aovendje van CV De Sjansemaekers in La Rochelle. Zoea wie gae det van ós gewèndj zeetj is ’t weer ‘n samengestèldj programma van boetedörpse en eige artieste. De bóntje aovendje staon al jaore bekèndj as ‘nne sjoeane bóntje mix van meziek, dans, sketches en natuurlijk de buut. Ouch dit jaor weer. Want wae höbbe väör uch DéDé Dansballet, winnaar SLK Sjötterie St. Petrus, de Boorinnebóndj, Bie 1 geraaptj, Kerboet mèt Kruutje, buut van Berry Knapen, Spik en Span en as aafsloeter op vriedig Marleen Rutten en op zaoterdig Kristel en Quin van W-Dreej. Ouch zal d’r ‘n speciaal väör ós jubileumjaor gemaakdje korte film vertoeandj waere, ‘n première die nemes moog misse.
Det belaove dus weer twië topaovendje te waere.

Zórg det gae ‘n kaertje höbtj en deze sjoean aovendje neet hooftj te misse. De väörverkoup startj op zunjig 10 fibrewari bie ’t Prinsehoes bie Sjrake oppe Laak. Kaartverkoup is tösse 11.00 oor en 12.00 oor. De kaarte koste €12,50. Vanaaf 11 fibrewari zeen de kaarte te koup bie Top 1 Toys op de Mäölewaeg.
|Doorsturen